U’ carusu da’ surfara

di Alberto D’Italia
Un tempu non troppu luntanu
C’era u’ bisugnu di dari na’ manu
Dintra a’ casa di tanti famigghi disagiati.

Quannu u’ figghiu arrivava a sei anni
I genitori u’ mannavanu cumu l’omini ranni
A ‘iri a travagghiari dintra a surfara
Unni a vita era troppu dura e tanta amara.

Dintra a’ miniera tra pericoli e calura
Pariva dassutta d’esseri dintra ‘na sepoltura,
cuddu caudu i mastri nudi cu’ picuni scavavano
e ppe nun pinzari, qualche canzona ‘ntunavanu.

Autri mastri cu’ a pala i stiratura inchivanu
E supra li spadduzzi de’ carusiddi u’ mintivanu,
ca anchi si prutetti di nu cappuccio e d’una chinnazzata
I vinti chila supra nu carusu nun eranu na biabbiata.

Poveri picciriddi senza scola, né arti né misteri
A so’ vita nonn’aviva nissunu avveniri, ogni sabatu
o so’ paisi s’innacchianavanu
e tutti i parenti e amici l’abbrazzavunu;

la matri forti forti su stringiva ‘mpettu
e lu figghiu ccu tantu amuri e rispettu
a paga da’ simana a so’ matri pruiva
ppi accattari tuttu chiddu can a so’ casa serviva.

Sti picciriddi cu lu cori ranni non na ma scurdari,
E nun facimu autri martiri da sfruttari,
datici ai ggiuvani travagghiu, paga e contributi,
e un serenu avveniri di onestà ppi i so’ diritti ottenuti.